101 ఏళ్ల వయసులోనూ ఆరోగ్యంగా.. దీర్ఘాయుష్షు రహస్యం చెప్పిన వృద్ధుడు!

ఎక్కువ కాలం జీవించాలంటే ఏం చేయాలి? ఆరోగ్యకరమైన ఆహారం తీసుకోవడం, వ్యాయామం చేయడం మాత్రమే కాదు.. మనసును సంతోషంగా ఉంచుకోవడం కూడా ముఖ్యమని చెబుతున్నారు అమెరికాకు చెందిన 101 ఏళ్ల కెన్నెత్‌ రేమ్‌. తన సుదీర్ఘ జీవితం వెనుకర రహస్యం సంతోషంగా ఉండటమేనని ఆయన వెల్లడించారు. కుటుంబంతో ప్రేమగా గడపడం, జీవితంలో రాజీపడటం నేర్చుకోవడం, చుట్టూ ఉన్నవారితో మంచి సంబంధాలు కొనసాగించడం తనకు మనశ్శాంతిని ఇచ్చాయని పీపుల్‌ మ్యాగజైన్‌కు ఇచ్చిన ఇంటర్వ్యూలో తెలిపారు.

తాను 100 ఏళ్లు జీవిస్తానని ఎప్పుడూ అనుకోలేదని కెన్నెత్‌ చెప్పారు. వెనక్కి తిరిగి చూసుకుంటే జీవితంలో ఎన్నో అనుభవాలు, మధుర జ్ఞాపకాలు ఉన్నాయని గుర్తుచేసుకున్నారు. సంతోషకరమైన వైవాహిక జీవితం, తనకు ఎంతో విలువైన కుటుంబం ఉండటం అదృష్టంగా భావిస్తున్నట్లు తెలిపారు. 101 ఏళ్ల వయసుకు చేరుకోవడం తనకు ఎంతో ఆనందాన్ని ఇస్తోందన్నారు.

సంతోషంగా ఉండటమే దీర్ఘాయుష్షుకు పునాది
తన జీవితంలో సంతోషానికి ప్రధాన కారణం తనతో తాను సంతృప్తిగా ఉండటమేనని కెన్నెత్‌ పేర్కొన్నారు. చుట్టూ ఉన్నవారితో సత్సంబంధాలు కలిగి ఉండటం కూడా ముఖ్యమన్నారు. మంచి వైవాహిక జీవితం, అవసరమైనప్పుడు రాజీపడే మనస్తత్వం, పిల్లలు సంతోషంగా ఉండటం తనకు ఎంతో ప్రశాంతతను ఇచ్చాయని వివరించారు. ప్రేమ, సంతోషం, మనశ్శాంతి ఉన్నప్పుడు జీవితం మరింత సులభంగా సాగుతుందని చెప్పారు.

మానసికంగా ఉల్లాసంగా ఉండటంతో పాటు రోజువారీ జీవితంలో చురుగ్గా పాల్గొనడం కూడా తనకు ఉపయోగపడిందని ఆయన అభిప్రాయపడ్డారు. ఖాళీగా కూర్చోకుండా ఏదో ఒక పనిలో నిమగ్నమవడం, చుట్టూ ఉన్న ప్రపంచంతో సంబంధాలు కొనసాగించడం తన జీవనశైలిలో భాగమని తెలిపారు.

కష్టాల మధ్య సాగిన బాల్యం
1925 ఏప్రిల్‌ 3న న్యూయార్క్‌లోని బ్రాంక్స్‌లో జన్మించిన కెన్నెత్‌ రేమ్‌.. తర్వాత కుటుంబంతో కలిసి క్వీన్స్‌కు మారారు. ఆయన సైన్యంలో పనిచేసిన అనుభవం ఉన్న వ్యక్తి. అనంతరం కంప్ట్రోలర్‌గా విధులు నిర్వహించారు. ప్రస్తుతం న్యూయార్క్‌లోని సేఫ్‌విల్‌లో ఉన్న ది బ్రిస్టల్‌ అనే సీనియర్‌ లివింగ్‌ కేంద్రంలో నివసిస్తున్నారు.

తన చిన్ననాటి రోజులను గుర్తుచేసుకుంటూ.. 1930ల ప్రారంభంలో తన తండ్రి లాంగ్‌ ఐలాండ్‌లో ఒక ఇంటి నిర్మాణం ప్రారంభించారని చెప్పారు. వేసవి సెలవుల్లో కుటుంబమంతా అక్కడ గడిపేవారమని తెలిపారు. అప్పట్లో ఇంట్లో విద్యుత్‌ సౌకర్యం, కుళాయి నీరు ఉండేవి కావని గుర్తుచేసుకున్నారు. ప్రతి సాయంత్రం తన సోదరుడితో కలిసి సమీపంలోని నీటి పంపు వద్దకు వెళ్లి కుటుంబానికి సరిపడా నీటిని బండిలో తీసుకొచ్చేవాళ్లమని వివరించారు.

ప్రస్తుతం 11 మంది మునిమనవళ్లు, మనవరాళ్లతో కూడిన పెద్ద కుటుంబం ఆయనకు అండగా ఉంది. దాంతో, కెన్నెత్‌ ఆనందంగా గడుపుతున్నారు. కుటుంబ సభ్యుల ప్రేమ, అనుబంధాలే తన జీవితంలో ముఖ్యమైన భాగమని ఆయన మాటలు తెలియజేస్తున్నాయి.

అయితే సంతోషంగా ఉండటం, చురుగ్గా జీవించడం ఆరోగ్యానికి తోడ్పడినా.. దీర్ఘాయుష్షుకు ఇవే ఏకైక కారణాలని చెప్పలేం. జన్యుపరమైన అంశాలు, ఆహారం, శారీరక ఆరోగ్యం, వైద్య సంరక్షణ, జీవన పరిస్థితులు కూడా మనిషి ఆయుష్షుపై ప్రభావం చూపుతాయి.